سینیٹر تھورپ آسٹریلین پارلیمان میں شاہ چارلس پر برس پڑیں: تم ہمارے بادشاہ نہیں ہو، آسٹریلیا تمہاری سرزمین نہیں ہے + تصاویر

اہل بیت(ع) نیوز ایجنسی ـ ابنا ـ کے مطابق، سینیٹر لِڈیا تھورپ جو قدیم آسٹریلوی باشندوں کی نسل سے تعلق رکھتی ہیں، نے چیخ کر لوگوں سے کہا کہ وہ برطانوی بادشاہ کی حکمرانی کو تسلیم نہ کریں۔

اُنھوں نے برطانوی بادشاہ سے کہا کہ ہماری زمینیں واپس کرو، جو کچھ بھی تم نے ہم سے چوری کر لیا ہے وہ ہمیں واپس کر دو۔

لڈیا تھورپ آسٹریلیا کے قدیم باشندوں کے حقوق کے لئے سرگرم عمل ہیں اور شاہ چارلس سوم کے دورہِ آسٹریلیا کے خلاف احتجاج کرنے والوں میں شامل رہی ہیں۔

رائٹرز نے رپورٹ دی ہے کہ اس سے پہلے جب لڈیا تھورپ نے پہلی بار آسٹریلوی سینٹ میں حلف اٹھاتے ہوئے بھی مٹھی ہوا میں لہرا کر کہا تھا کہ ملکہ الیزبتھ مستعمرہ (colonizer) ہے۔ یہ وقت تھا جب ملکہ بقید حیات تھیں۔

گرین پارٹی کی رکن لڈیا تھورپ  سینٹ میں قدیم آسٹریلوی باشندوں کی نمائندہ ہیں اور یہ قدیم باشندے وہی ہیں جن کا برطانوی سامراج نے آسٹریلیا پر حملہ کرکے، قتل عام کیا اور ان کی صرف 10 فیصد آبادی انگریز جلادوں کی جارحیت اور مختلف النوع بیماریوں سے محفوظ رہی۔

باقیماندہ قدیم آسٹریلویوں کی چشم و چراغ لڈیا تھورپ ریاست وکٹوریا سے آزاد سینیٹر ہیں جنہوں نے بادشاہ چارلس سوئم  کی تقریر کے موقع پر ان کے قریب پہنچ کر چیخ چیخ کر کہا: یہ تمہارا ملک نہیں ہے۔

چارلس سوئم اپنی ماں الیزبتھ کی موت کے بعد بادشاہ بنے ہیں اور وہ پہلی مرتبہ آسٹریلیا جاکر ـ بادشاہی جتانے ـ کے لئے پارلیمان سے خطاب کر رہے تھے کہ انہیں سینیٹر تھورپ کی کھری کھری باتیں سننا پڑیں۔

تھورپ نے آسٹریلیا کے قدیم باشندوں کے خلاف برطانوی استعمار کے جرائم کی طرف اشارہ کرتے ہوئے چلا کر کہا: تم نے ہمارے عوام کی نسل کشی کی ہے۔ ہماری سرزمین واپس کرو، اور جو کچھ بھی تم نے ہم سے چرایا ہے وہ ہمیں واپس کر دو۔

اس موقع پر جب سیکیورٹی اہلکاروں نے سینیٹر تھورپ کو بادشاہ کے قریب جانے سے روکا اور وہاں سے باہر لے جانے لگے تو انھوں نے انتہائی غضب ناک ہوکر چارلس سوئم سے کہا:  تم نے ہماری سرزمین کو تباہ کر دیا، ہمیں ایک معاہدہ دے دو۔ ہم اس ملک کے لئے ایک معاہدے کے خواہاں ہیں۔ تم نسل کشی کے مرتکب ہوئے ہو۔ آسٹریلیا تمہاری سرزمین نہیں ہے، تم میرے بادشاہ نہیں ہو، تم ہمارے بادشاہ نہیں ہو۔

تھورپ جو قدیم آسٹریلوی باشندوں کا روایتی اوورکوٹ پہنی ہوئی تھیں، بادشاہ سے دور ہونے سے پہلے چیخ چیخ کر کہہ رہی تھیں: لعنت ہو سامراجیوں پر، لعنت ہو مستعمر (colonizer) پر۔

۔۔۔۔۔۔۔۔۔

110